Wine Diary - Ch Sopot / Jan 2018

Додека лозјата мируваат околу винаријата Сопот која како светилник им го покажува патот на винските вљубеници, во самата винарија се одвиваат последните подготовки за пролетното лансирање на некој свежи и овошни вина, додека пак другите ќе го продолжат својот сон во француските спални на познатиот Seguin Moreau.

Chateau Sopot (chai)

"Го очекував вашиот повик", пријатно ме изненади гласот на енологот Божидар Илиевски, во моментов главен и одговорен за вината на прилично динaмичната винарија Шато Сопот. Средбата беше договорена за пет минути, а почна да се реализира само еден час од разговорот во самата винарија, тоа е тој адренавински импулс кој не те остава да мируваш. 
Возејќи натаму размислував колку бурна година имаше винаријата Сопот, многу промени, инвестиции, реорганизации, во одреден момент ми делуваше, во кафански манир, како да не се знаеше кој пие а кој плаќа, но дали тоа ги дефокусираше и остави негативен траг врз бербата 2017 ?! Ќе видиме, вртам од винскиот автопат во морето лози правец островот Сопот.

Онака грубо низ бројки, 90 ha под винова лоза, сопствен насад во чија средина е винарија со капацитет од 100k шишиња, во која нема да најдете преса, од прва наговестува висок квалитет. Ако на тоа го додадеме расположениот темперамент на Божидар, а вината не се разликуваат од своите креатори, како што напоменува и тој самиот, во што се согласувам и додавам низ смеа дека до сега не сум пробал лошо вино од добар енолог, тогаш резултатот е повеќе од ветувачки. 
После петминутното одмерување на брановите должини, кршење на мразот и меѓусебно запознавање, како и кај секој друг енолог следи запознавање со неговото "семејство",  а таму невиден спокој, нема да ги будиме, со светнати очи мрмориме, само ќе им земеме "мерка". 
Она што би го издвоил во оваа фаза е сивото Пино 2017 кој е со јасна и средно интензивна ароматика на цитрусни и ароми на круша, јаболко, лозарска праска. На вкус свеж, сочен, овошен, средно тело, во многу добар баланс киселини-шеќери-овошност, италијански стил, смер Повардарије.
Хармоничното и свежо Шардоне 2017 кое по мое 

мислење е најдобро да оди без одлежување во даб како не би го изгубило интензивниот овошен карактер, кој пак е обликуван од класичните ароми на Шардоне како по книга, цитрусни ароми следени со ароми на зелено јаболко. На вкус освежително, лесно, овошно хармонично.
Од црвените вина, вообичаено доброто Пино Ноар на Шато Сопот, комплексно, ароми на шумски лисја, вкусен дивеч, следени од овошни ароми на малина, рибизла, цреша. На вкус слоевито, кадифени танини, свежи овошни и зачински ноти. секоја голтка нова приказна.
Мерло 2017 нешто што навистина треба да се проба, одлично структуирано, цврсто, моќно но воедно елегантно и заводливо. Ова само потврдува дека во Македонија имаме "опасни" мерлоа. 
Дегустиравме уште вина на кои им следат дополнителни процеси, зреење, купажирање итн. од кој ќе зависи нивниот конечен квалитет, како што се три кабернеа, две темјаники, ризлинг, шардоне на фини квасци од 2016, розе од каб. и моќен Вранец кој уште њишти во танкот, јас би го префрлил во друга просторија да не ги вознемирува останантите.

SW - blanc de blancs methode traditionnelle

Како ново во понудата ќе се појави наскоро и пенливото вино по традиционална метода, блoн-де-блон, што значи дека е добиено исклучиво од сортата Шардоне. После повеќе од 4 години зреење, мирување, автолиза ... полека се спрема за претставување на жедната публика.

Она што е прилично голем проблем кај вината на Шато Сопот, а што секако треба да го имате во предвид е што овие вина ги нема во доволна количина.

На здравје !
​